Арал аудандық мұрағаты деректері негізінде мектеп ғимараты 1930 жылы Арал аудандық халыққа білім беру бөлімінің «Арал қалалық №13 бастауыш мектебі» болып негізі қаланған. Бастауыш мектеп 1938-1939 оқу жылында «Арал №13 жеті жылдық мектебі» болып қайта құрылып, 1939 жылдан бастап Т.Рысқұлов атындағы орта мектебі болып өзгертілген. Ал, 1939 жыл 05 наурызда «Т.Г.Шевченко атындағы №13 орта мектебі» болып ауыстырылып, бүгінгі күні «Қызылорда облысының Арал ауданы бойынша білім бөлімінің «Т.Г.Шевченко атындағы №13 орта мектебі» КММ болып, жергілікті жердің білім алушыларына оқу-ағарту жұмыстарын жүргізіп келеді. Мектеп ұжымында 90 педагог, 47 техникалық, барлығы 137 қызметкер жұмыс жасайды. Мектеп Арал қаласының орталығында Қарасақал Ерімбет көшесі №15 мекен-жайда орналасқан, 2 қабатты, 350 орындық ғимарат. Қосымша құрылыс ретінде 1985 жылы салынған спортзал және осы мектеппен қатар салынған «Порт» мекемесі ғимараты қосымша беріліп, олар бертін келе негізгі ғимаратқа тізбектеліп жалғанып, бір ғимарат есебінде техникалық паспорты жасалынған. Орналасқан жер аумағы – 0,5175 га, жалпы алаңы – 2013,8 м², пайдалы алаңы – 1862,1 м². Мектепте 2022-2023 оқу жылында 1-11 сыныптар бойынша 35 сынып комплектосында 795 білім алушы, 2 мектепалды даярық топтарында 48 тәрбиеленуші, барлығы 843 бала, яғни мектептің сыйымдылығынан 2,5 есеге жуық бала артық, 2 ауысымда оқиды. Асхананың тамақтану бөлмесі 23,7 м², мұнда 2, 3, 4, 5 сабақ үзілістерінде 170 бала тамақтанады. Сынып бөлмелері саны – 20. Бөлмелер ауданы 23,4 м² – 50,7 м² аралығында. Технология пәні бойынша ер балалар шеберханасының аумағы 31 м², қыз балалар шеберханасы 15,4 м² болатын бейімделген бөлмелерде сабақ жүреді. Кітапхана аумағы 40,4 м², осы шағын бөлмеде 2 кітапханашы, оқырмандар залы, оқулықтар мен көркем әдеби кітаптар сөрелері, интернет желісіне қосылған 6 дана дербес компьютер, стеллаждар орналасқан.